ORMOC CITY – Wala mag dahom ang bag-ong henerasyon sa Tongonan Farmers Associaion (TOFA) nga maani nila ang gihagoan sa mga ginikanan sa dugay nga panahon.
“Pasalamat mi sa EDC nga wala mi talikdi,” pulong pa ni Chona Parco, TOFA President, atul sa programa pag lunsad sa ilang Coffee & Cacao Processing Facility didto sa Brgy. Tongonan ning dakbayan niadtong Inero 17.
Nisaad siya nga tambayayungan sa ilang grupo aron ma tagamtaman pod unya kini sa ilang mga anak.
Gipasalamatan pod sa asosasyon ang suporta sa LGU-Ormoc og Department of Science and Technology (DOST).
Si SP Member Nolitz Quilang maoy ni representar ni Mayor Lucy Torres Gomez sa seremonyas. Matud niya, usa lang ang TOFA sa kapin sa usa ka gatos nga livelihood association sa Ormoc, kasagaran nanginahanglan og suporta sa LGU.
Gibutyag pod sa Konsehal ang dako og kalambigitan si Congressman Richard Gomez sa katumanan karon sa TOFA sanglit usa kini sa gihingosgan dihang Mayor pa siya sa Ormoc. Nanghinaot si Quilang nga pinaagi sa “teamwork” masustinir sa nasangpit nga asosasyon ang ilang estado; ug molambo ang panginabuhi apil ang ilang pamilya.
Gipasalamatan pod sa Energy Development Corporation (EDC) ang maong asosasyon nga kaabag sa EDC pag bantay og pag protehir sa kinaiyahan nga nagliyok sa liboan ka hektaryang lasang diin naa nahimotang ang geothermal energy facility. “We are thankful to TOFA for being guardians of our reforestation areas here in Leyte all these years,” pulong pa ni Erwin Magallanes, head sa EDC Corporate Relations dinhi sa Leyte.
Samtang sa maong adlaw gilunsad pod sa EDC ang BINHI Vegetative Materials Reproduction (VMR) Nursery, kansang katuyoan nga dili mawala sa hingpit ang mga nag anam na og kahanaw nga mga talagsaon og lig-on nga mga klase sa kahoy.
Dunay 96 ka mga matang sa punoan nga gipadaghan karon sa BINHI. Ubay-ubay niini naa na sa kritikal nang kondisyon nga mawagtang sa kalasangan sa Pilipinas base sa pag tuon sa International Union for Conservation of Nature (IUCN).
Pinaagi niining VMR Nursery makahatag ang EDC sa BINHI og mga igtatanom ingon man usab ang mga tukmang impormasyon labi na sa mga tinun-an kalabot sa reforestation ug maka ambag nga masolusyonan ang nagka init na nga kalibutan. Ang 711-megawatt nga pasilidad dinhi sa Leyte pinaagi sa EDC maoy nag supply sa 30% nga kapasidad sa geothermal sa nasud. Mao usab kini responsable pag butang sa Pilipinas ngadto sa mapa sa kalibutan isip “third largest geothermal producer” og gi saligan pag supply sa limpyo nga enerhiya paingon sa mga rehiyon sa Luzon og Kabisayaan sa hapit 40 na ka tuig. Ni Josie Sersena (EV Mail January 16-22, 2023 issue)
