ALBUERA, LEYTE – Napriso pa hangtod karon sa Albuera Municipal Police Station (AMPS) ang usa ka senior citizen nga lalaki human nag paboto og armas de fuego niadtong Pasko, Deciembre 25, 2022 alas 7:20 sa gabii sa Sitio Gingab, Brgy. Poblacion ning lungsod.
Ang suspitsado mao si Rolando Pilones y Pasos, 62 anyos, mag-uuma og residenti sa Brgy. Sherwood, Albuera, Leyte. Gipasakaan na siyag kasong paglapas sa Republic Act 10591 og Alarms and Scandals.
Naaktohan pa kini nga nag kupot sa armas nga may magazine og dunay sulod nga upat ka buhing bala, dihang girespondihan sa kapolisan nga gipangunahan ni PSSGg Lemuel E. Imba kauban ang unom ka PNCOs ubos sa superbisyon ni PMAJ Miguelito N. Bocade, ACOP.
Dugang taho nga nakuha sa EV Mail niadtong Inero 11, 2023 nga nakadawat ang estasyon og tawag sa concerned citizen kabahin sa kasamok nga gihimo ni Pilones. Ug pag abot sa autoridad sa nahitaboan bitbit na niini ang armas, busa gikompiska dayon nila. Nasayran nga usa kini ka cal. 45 pistol nga may marka nga “UNITED STATE PROPERTY/M1911A1 U. S. ARMY.” Giaresto ang suspek og gipangutana kon autorisado siyang mag hupot niini, apan wala siyay napakita nga dokuminto sa mga arresting officer. Human gipasabot nganung gidakop siya, gihibaw pod sa iyang mga katungod gamit ang pinulongan nga iyang nasabtan; dayon gi tanggong sa pasilidad sa AMPS aron mahan-ay ang dokumentasyon og pormal nga masang-at sa korte ang kaso batok kaniya. Ni Josie Sersena (EV Mail January 9-15, 2023 issue)
