ORMOC CITY – Nagsubo ang pamilya sa usa ka senior citizen nga namatay human nadasmagan sa truck, diin nahulog pa kini sa drainage canal daplin sa national highway, hapon sa Inero 15.
Ang babayi nga biktima usa ka 72 anyos ug gikompirma mismo sa ilang Kapitan nga taga Brgy. Salvacion kini sakop sa syudad sa Ormoc. Nasayran nga didto daplin sa karsada nag-barog ang biktima aron motabok na unta sa atbang kay mopa-uli; dihang kalit nidasmag ang truck sa iyang nahimutangan. Nalahos ang maong sakyanan sa kasagbutan, pero una nang nadanas ang biktima ug nahulog sa uga nga kanal.
Ang nasangpit nga delivery truck gimaniho sa 54 anyos nga taga Tolosa, Leyte. Sumala pa sa mga nakakita, gikan sa city proper sa Ormoc ang maong truck ug nag-byahi padulong sa direksyon sa Tacloban. Matud pa nawad-an ug kontrol ang driver ug nahasimang hangtod naabot ngadto sa kasagbutan. Ang biktima nadala pa sa hospital pero gidiklara kining dead-on-arrival (DOA). Padayon pa karon ang imbistigasyon sa maong kaso. (Ni Josie Serseña / EV Mail JAN. 13-19, 2025 issue)