ORMOC CITY – Sigun sa gilatid sa balaod sa DILG gimandoan ang mga opisyales sa barangay nga magpahigayon ug asembliya kaduha sa usa ka tuig; ug sa dakbayan sa Ormoc sagad ang Barangay Assembly paga-himuon sa bulan sa Marso alang sa unang semestre ug pagka Octobre para sa ika-duhang unom ka bulan.
Sa maong panagtigum anaa ang representanti sa mga ahensya ug departamento sa national ug lokal nga gobierno. Didto sa gitambongan ni Hon. Lalaine Marcos sa Barangay Kadaohan diin iyang siya na imbitahan, iyang gisayran ang mitambong sa kamahinungdanon sa mga kalihokan sa barangay labi ang Barangay Assembly. Iya usab gidasig ang katawhan sa pagbasa sa unsay ipang istampar sa barangay kay aron maka kuha sa insaktong impormasyon.
Angay pahimuslan ang mga higayon, kay diha sa asembliya paga hisgutan ang mga importanting butang, ug mahibaw ang matag-usa sa responsibilidad, anha usab masayran ang mga nahimo ug plano pa sa barangay, mga implementasyon sa mga balaod og ordinansa sa syudad nga angay ipatuman sa barangay ug daghan pang uban hisgutanan.
Kini usab ang higayon nga mahimo silang maka pangutana direkta sa mga opisyales sa barangay partikular ang budget o pundo kon asa na padung ang “kwarta” kaysa walay kasayuran ug mag bagolbol nalang.
Si SPM Marcos ang nagdala sa konseho sa syudad alang sa Environment; diin usa sa kanunay problema ug reklamo sa barangay ang basura, nga angay ilain ang malata ug dili malata, mga langaw ug kabaho labi na kon duol sa poultry ug tangkal sa baboy. Sagad sa implementasyon gitugyan na sa barangay ug hugot nga gipasabot sa Konsehala nga “patas ug walay pabor-pabor ang balaod.” (Ni Josie Serseña / EV Mail March 31-April 6, 2025 issue)
