ALBUERA, LEYTE – Usa ka mahinungdanon nga projekto na usab ang namugna sa Albuera ubos sa paningkamot sa administrasyon nga gipangulohan karon ni Mayor Sixto Dela Victoria.
Kini mao ang Super Health Center nga nahimutang didto sa Brgy. San Pedro sa nasangpit nga lungsod. Ang turnover ceremony gipahigayon niadtong Marso 26, 2025. Ang Super Health Center naghatag kini ug marka ug dugang kalamboan sa lungsod, pagmatuod nga gihatagan ug importansya sa liderato ni Mayor Dela Victoria ang kahimsog sa panglawas sa katawhan sa Albuera. Kini usab nga pasilidad namugna pinaagi sa tabang ni Senator Bong Go.
Ang pasilidad dunay moderno nga kagamitan, pinasahi nga serbisyong medikal ug dumalahon ug mga propesyonal sa natad sa gitawag nga health care services. Tungod sa Super Health Center dili na mobyahi pa ug layo ang mga Albueranon para sa ilang panginahanglan ug medikal nga atensyon.
Mensahi pa sa LGU pinaagi sa Mayor’s office nga, “This newly inaugurated health center will play a crucial role in addressing the health needs of the municipality by offering a range of services, including regular check-ups, preventive care, diagnostic services, and treatments for various illnesses.” Ug pinaagi niini, duna nay mas kasaligan ug dekalidad nga kahimanan medikal. Pinaagi usab sa makanunayon nga suporta gikan sa nasyonal og lokal nga lideres sama ni Mayor Dela Victoria og Senator Go, ang mga Super Health Center magsilbing “catalyst” nga mas mahimsog ang katawhan sa kalungsuran sama sa Albuera. (Ni Josie Serseña / EV Mail March 24-30, 2025 issue)
