BAYBAY CITY – Tanggong na karon sa Mondragon Municipal Police Station (MPS) ang suspek sa rape-homicide case human nilampos ang Baybay City Police Station (CPS), ubos kang PLTCOL Nerro M. Hobrero ug Mondragon MPS sa pag-sikop kaniya didto sa maong lungsod niadtong Marso 18, 2025.
Resulta kini sa gipalapad nga imbistigasyon sa kapolisan sa Baybay ug sa Mondragon, Northern Samar. Mahinumdoman nga nagpahigayon dayon ug “hot pursuit operation” ang taga 1st ug 2nd Leyte Provincial Mobile Force Companies ug mga kasikbit nga estasyon tungod sa insidenti nga nahitabo sa dakbayan sa Baybay niadtong Marso 17, 2025.
Ang suspitsado giila nga si alyas “Empong,” 37 anyos, barangay assistant electrician ug residenti sa Brgy. Hipusngo, Baybay City, Leyte. Mahinumdoman nga usa ka estudyanti nga residenti sa nahisgutang barangay, 13 anyos nga dalagita ang nakit-an sa kapilya sa Brgy. Hipusngo, Baybay City buntag niadtong Marso 17, 2025. Wala na kini kinabuhi ug gituhoan nga gipanamastamasan.
“This arrest demonstrates the steadfast commitment of Baybay CPS, Mondragon MPS, and all partner units to hold offenders accountable. The community also played a vital role in identifying and locating the suspect, and we are sincerely thankful,” pahayag pa ni Hobrero. (Ni Josie Serseña / EV Mail March 17-23, 2025 issue)
