ALBUERA, LEYTE – Human sa 16 ka oras gikan nahitabo ang mangilngig nga krimen, nasikop sa mga autoridad ang suspek nga si alyas “Eloy.”
Samtang ang bag-ong napili nga Mayor sa lungsod nga si Kerwin Espinosa nitunol ug PHP100,000.00 ngadto sa importanti nga maoy nag giya sa nahimutangan sa suspek. Sigun sa report sa Albuera Municipal Police Station nga ang suspek residenti sa Sitio Katipunan, Brgy. San Pedro, lungsod sa Albuera.
Mahinundoman nga nagmontar dayon ug “hot pursuit operation” ang Albuera Municipal Police Station sa pagpanguna ni Police Major Angelo L. Sibunga, batok sa suspitsado sa insidenti mga alas 10:00 sa gabii niadtong Hunyo 10, 2025 didto sa Sitio Cayag-ang, Barangay San Pedro, Albuera, Leyte. Pagka-ingon ugma sa hapon sa Hunyo 11, nasikop si alyas “Eloy” nga nikagiw didto sa Sitio Laray, Brgy. Boroc, dakbayan sa Ormoc.
Pagrespondi sa kapolisan naabtan nila ang biktima sulod sa ilang pinoy-anan nga daghan ug samad tinigbasan sa lain-laing parti sa lawas niini. Nirespondi pod ang Albuera Rescue Unit aron madala ang mga samaron nga mga biktima hospital sa Ormoc. Nasayran nga patay ang duha ka bata samtang samaran ang nawong ug halos maputol ang duha ka kamot sa ilang inahan.
Problema pa sa kabanay sa biktima kay kinahanglan operahan ug taoran sa stainless aron masumpay ang nag kawil-kawil nga parti sa kamot niini, hasta ang sa may apapangig. Ang mga batang biktima humabos ra sa suspek ug dili niya kini porsoso nga mga anak. Sanglit anak kini sa biktimang inahan una pa sila nagka relasyon.
Dugang pa usab nga gumikan sa kahubog ug selos ang motibo sa suspitsado nga nabuhat niini ang maong krimen. Nagtingkagol na ang suspitsado sulod sa karsel ug ubos karon sa kustodiya sa Albuera PNP. Nag-atubang kinig asunto nga “two counts of murder and frustrated murder in relation to RA No. 9262.” (Ni Josie Serseña / EV Mail JUNE 9-15, 2025 issue)
