MATAG-OB, LEYTE – Human sa taodtaod nga pag bantay (surveillance), dakpan ang usa ka lalaki nga tigpayuhot sa illegal nga drogas.
Ang suspitsado ginganlan og Ruben Villamor y Sotur, 52 anyos, taga Brgy. San Marcelino ning lungsod. Gilunsad ang buy-bust operation mga alas singko y media sa hapon (5:30PM) niadtong Nobiembre 25, didto sa nahisgutang lugar.
Nasayran nga nadakpan na siya niadtong 2016 sa mao gihapong salaud, apan naka gawas pagka 2019. Ning higayona pinaagi sa poseur buyer ug confidential informant napalitan si Villamor og usa (1) ka sachet sa gidudahang shabu sa kantidad nga usa ka libo ka pesos (PHP 1,000).
Nikisi-kisi ang suspek dihang akto na siyang aristohon sa mga operatiba pero napakalma ra kini ingon man ang sitwasyon sa palibot.
Pag-rikisa, narekober sa iyang posisyon ang usa ka libo ka pesos (PHP 1,000) nga gigamit isip “buy-bust money” nga may serial number nga EH975372. Ingon man usab ang upat (4) ka gagmay nga paketi nga may sulod sa gidudahang shabu.
Usa ka gamay nga sling bag nga color violet ang gigamit sa suspek nga sudlan sa maong mga ebidensya. Duna poy kwarta nga one hundred seventy two pesos (PHP 172. 00) nga nakuha sa autoridad gikan sa tuong bulsa sa iyang short pants.
Sa maong mga oras gidala ang ebidensya og ang suspitsado sa crime laboratory sa dakbayan sa Ormoc aron ipailawom sa examinasyon.
Sigun sa gidiklara sa kapolisan, ang estimate nga kantidad sa mga ebidensyang drogas niabot sa singko mil pesos (PHP 5,000) base sa timbang nga 0.70 grams.
Gikustodiya na sa pasilidad sa Matag-ob Municipal Police Station ang suspek nga si Ruben Villamor samtang giandam ang kasong paglapas sa Section 5 ug Section 11, Article II sa Republic Act 9165, kon ang balaod na Comprehensive Dangerous Drugs Act.
Ang joint team sa Matag-ob Municipal Police Station Drug Enforcement Unit gipangulohan ni PMAJ Arturo A. Salvacion, Jr., ACOP, ug taga PDEU LPPO ubos sa direktang superbisyon ni PLT COL Recaredo S. Marasigan.
Kauban sa EV Mail pag-saksi sa operasyon hilabi na sa imbentaryo ang duha ka Kagawad sa Brgy. San Marcelino nga sila si Hon. Julita Precilles ug Hon. Julita Borden.
Dihang nakahinabi si Ruben Villamor, niangkon siya gumikan sa dautang bisyo dihang napriso siya sa una og mga tolo (3) ka tuig. Gani na baligya man ang napundar niyang sakyanan. Naka-gawas siya sa Sub-Provincial Jail pinaagi sa gitawag nga “plea bargaining.” Pero karon nang hinaot siya nga duna pay alibyo ang iyang kaso, sanglit naka eskidyol naman silang pamilya nga mamasko sa Korea kay tua siyay usa ka anak didto. Naanugonan pod siya sa iyang basakan og daruhan nga wala nay mag-atiman kon magdugay siya sa prisohan. Ni Josie Sersena (EV Mail November 21-27, 2022)
