ORMOC CITY – Gipangunahan ni Police Captain Jason N. Mateo ang buy-bust operation sa Ormoc City Police Station 4 (OCPS-4) Drug Enforcement Team sa kolaborasyon usab sa Philippine Drug Enforcement Agency (PDEA), nga niresulta sa pagka aresto sa tolo (3) ka mga drug peddler didto sa Brgy. Punta, Ormoc City niadtong Hunyo 9, 2025.
Giila ang mga naaresto nga sila si alyas “Buding,” 39 anyos, olitaw, walay trabaho ug residenti sa Brgy. Punta, Ormoc City ug usa ka High Value Individual. Ingon man usab si alyas “Quen,” 31 anyos, olitaw, og si alyas “Embo,” 31 anyos, olitaw, driver. Pulos silang duha residenti sa Albuera, Leyte ug parihong naa sa listahan sa mga Street Level Individuals (SLI).
Nakompiska sa operasyon ang onse (11) ka paketi nga dunay sulod sa gidudahang shabu, usa (1) ka tinuod nga five-hundred-peso bill (PHP500.00) isip buy-bust money, pouch, lighter, coin purse, cigarette pack ug uban pang gamit sa gituhoang illegal nga bisyo.
Pagkahuman sila pasabta sa ilang katungod gidala na silang tolo ngadto sa OCPS-4 diin sila gikustodiya. Samtang ang mga ebedinsya gi-turn over sa Ormoc City Forensic Unit sa Brgy. Camp Downes, Ormoc, City.
Gikasohan na silang tolo ug kalapasan sa Sections 5 ug 11 ubos sa RA No. 9165 o Comprehensive Dangerous Drugs Act of 2002. (Ni Josie Serseña / EV Mail JUNE 9-15, 2025 issue)
