ORMOC CITY – Duha ang kompirmadong namatay human nasunog ang tolo ka balay sa Purok Dahlia,  Brgy. Cogon ning syudad kadlawon sa Augusto 21.

Giila ang mga biktima nga sila si Belen Sumalinog, 62 anyos, og ang iyang anak nga si Lyndon, 36 anyos. Napalgan ang patayng lawas sa inahan dapit sa kusina, samtang ang anak didto sulod pa sa kwarto niini. 

Nadawat sa kabomberohan ang alarma sa sunog mga alas 2:35 sa kadlawon diin niresponde dayon ang BFP-Ormoc City Fire Station sa pag panguna ni SINSP Leo Joshua Dangatan.

Matud pa nagsugod pagkaylap ang kayo mga alas 2:26AM sa balay sa mga Sumalinog. Gidiklara kini nga fire under control mga alas 3:27AM og hingpit nga napawong pagka alas 4:02AM. Polos gikan ra sa Ormoc City Fire Station ang mga niresponde sanglit gipa ubos lamang sa ‘second alarm’ status ang katergorya sa insidenti. 

Ang lain pang naugdaw nga duha ka balay gipanag-iya sa manag suong Gracilda ug Randy Montalban. Ginama sa light materials ang usa ka andana nga balay nila Sumalinog, pero ang sa mga Montalban katunga simentado og ang katunga ginama sa light materials.  Gibana-bana nga niabot og dul-an sa duha ka milyon ka pesos (Php 1,890,735) ang danyos sa sunog. Padayon pa ang imbistigasyon sa maong hitabo aron masabtan ang hinungdan niini, sumala pa ni SFO1 Dino Daniel Barsumo, ang Fire Investigator. Ni Josie Sersena ug hulagway gikan sa Ormoc City Fire Station (EV Mail August 22-28, 2022 issue)