ORMOC CITY – Kon unsa ka tam-is ang duga sa tubo nga mahimong asukar mao sab kapait ang katumbas nga gidangatan sa tolo ka mga lalaki human masakpi sa akto nga nag “pot session” sa katubhan sakop sa Purok 2, Brgy. Donghol, ning syudad mga alas 4:30 sa hapon niadtong Pebrero 26.
Ang mga suspitsado pulos mga motorcab driver nga sila si Rico James Muaña, Arlie Canonigo, Jr., Reneboy Dumagsa, edad 25 ngadto sa 27 anyos, og mga molopyo ning syudad sa Ormoc.
Nakuha sa lugar og sa ilang posisyon ang usa ka paketi sa illegal nga droga kon shabu apil na ang mga kagamitan timaan sa ilang pag suyop nga aktibidad sama sa mga foil og uban pa.
Asoy pa sa komunidad nga misuway pa unta sila pag ikyas apan nasikop sila sa autoridad apil na ang mga opisyales sa nahisgutang barangay. Gidayig sa liderato sa Ormoc City Police Office (OCPO) ang pag pakabana og kaabtik sa mga Barangay Officials nga nitaho sa autoridad.
Matud pa na obserbahan sa katawhan busa ilang gipanid-an ang pag honong sa tricycle didtong dapita nga awa-aw o layo sa kabalayan. Nag malamposon ang operasyon nga gilangkuban sa personnel sa Police Station-1 SDET ubos ni PCPT. Ramil Caldona kauban ang gikan sa Police Station-4 pinangulohan ni PCPT. Petronio Piangco. Ni Josie Sersena (EV Mail Feb. 27-March 5, 2023 issue)
