ORMOC CITY – Nasikop ang tolo ka mga mag-uuma dihang naglunsad sa operasyon ang kapolisan sa Ormoc City Police Station 3 (OCPS-3) kauban ang taga Philippine Drug Enforcement Agency 8 (PDEA), pinaagi sa buy-bust operation didto sa Brgy. Manlilinao, Ormoc City, niadtong Mayo 28, 2025.
Ang tolo ka mga giingong Street Level Individual nasikop base sa programa sa SACLEO sa PNP. Giila sila pinaagi sa ilang alyas nga “Jessie,” 26 anyos, “Takmo,” 24 anyos, ug “Exsael,” 33 anyos. Pulos ra usab sila nagpuyo sa maong barangay.
Nakompiska gikan kang “Jessie” ang usa (1) ka heat-sealed transparent plastic sachet ug lain pang tolo (3) ka paketi nga dunay sulod sa gidudahang shabu, apil ang usa ka five hundred peso bill (PHP500.00) isip buy-bust money. Samtang nakuha sa posisyon ni “Takmo” ang duha (2) ka paketi sa gidudahang shabu; ug gikan kang “Exsael” ang usa ka paketi usab sa gidudahang shabu.
Naa na sila sa custodial facility sa OCPS-3 ning dakbayan. “We are committed to upholding the law and ensuring that justice is served in Ormoc City. The successful apprehension of the aforesaid suspects reflects our dedication to maintain peace and order in our community. We will continue to work diligently with our partner agencies to ensure that those who violate the law are held accountable for their actions,” matud pa sa hepe nga si Police Major Cartalla. (Ni Josie Serseña / EV Mail June 2-8, 2025 issue)
