CARIGARA, LEYTE – Usa ka lider sa NPA ug duha pa ka kauban niini ang namatay atul sa panag engkwentro tali sa mga teroristang-rebelding grupo og sa militar didto sa bukirang bahin sa Brgy. Cogon, Carigara, Leyte niadtong Hunyo 18, 2025.
Nilungtad sa 20 minutos nga pinusilay sa tropa sa 93rd Infantry “Bantay Kapayapaan” Battalion, ubos sa 8th Infantry “Stormtroopers” Division, sa Philippine Army, ang nahitabo batok sa mga miembro usab sa Island Committee (IC) LEVOX, Eastern Visayas Regional Party Committee (EVRPC).
Pinaagi sa Commanding Officer sa 93IB nga si LTC Charlie Saclot giila ang mga napatay nga sila si Juanito P. Sellesa, Jr., alyas “Tibor,” ang Executive Committee Member sa IC LEVOX; ingon man si Eugene Paclita, alyas “Dimple,” Leader sa Squad 2; og si Lito D. Laurente, alyas “Dodong” nga miembro sa maong squad. Nahiuli na ang mga patayng lawas sa napatay ngadto sa tagsatagsa nila ka pamilya.
Narekober sa gihimong temporaryong tagu-anan sa mga NPA ang usa ka M16 riffle ug duha ka tag-as nga magazine niini, usa ka cal. 45 pistol nga dunay duha ka magazine, usa ka hand grenade, mga personal nga gamit, ug mga subersibong dokumento.
Si Major General Adonis Ariel G. Orio, ang Commander sa 8th Infantry Division, subli nga nanawagan sa nahibiling sakop sa kalihukan sa Communist Terrorist Group, nga mosurender na sa gobierno. Gipasabot niya ang mga benipisyo nga ilang makuha apil na ang maayong kaugmaon sa pamilya kon mobiya sila sa armadong pakig bisog.
Sumala sa militar nga “wanted” sa kasong murder si alyas “Tibor” ug iyang grupo tungod sa pagpatay sa usa ka Jesus Sarcilla alyas “Sasing,” atubangan mismo sa iyang anak didto sa Brgy. Binibihan, Carigara, Leyte niadtong Deciembre 7, 2021. Ang Kumander sa 802nd Brigade nga si BGen Noel Vestuir nagkanayon nga sa kamatayon nila ni Tibor, nakaangkon man lang ug hustisya ang pamilya sa ilang mga nahimong biktima.(Ni Josie Serseña / EV Mail JUNE 16-22, 2025 issue)
