ALBUERA, LEYTE – Arestado sa Albuera PNP ang Top 6 nga Most Wanted Person sa rehiyon otso niadtong Nobiembre 28, 2024 sa may mga alas 11:30 sa buntag, didto sa Sitio Gungab, Poblacion sa Albuera.
Statutory rape ang kaso sa akusado. Ang operating team ubos kang PCPT Julio G. Tamayo, Jr. sa LPPPO ubos usab sa superbisyon ni PCOL Dionisio DC Apas, Jr., ug sa suporta ni PLTCOL Seth Mark Alob, sa Regional Intelligence Division, PLTCOL Julito A. Rabena II, sa Provincial Intelligence Unit, PLTCOL Maximo M. Bello, sa 1st LPMFC, PMAJ Felix Dennis P. Alicando, CIDG NL PFU ug PLT Mariano Cerro, Jr., RIU 8 CIT ORMOC.
Gi-ila kini sa alyas “Nick,” 52 anyos, byudo, ug usa ka construction worker, residenti ra usab sa maong dapit. Ang pagsikop kaniya pinasikad sa Warrant of Arrest sa krimen nga Statutory Rape. Ang mando gi-isyu sa Presiding Judge sa Regional Trial Court Branch 14, Baybay City, niadtong Nobiembre 27 ning tuiga ug walay gitugot nga pyansa.
Human pasabta ang akusado sa salaud ug iyang katungod, gidala na kini sa Albuera MPS diin anaa siya gi-kustodiya. Subli nga gipasabot ni PCPT Tamayo, Jr. ang didikasyon sa kapolisan sa Albuera pagtugis sa mga kriminal aron magpabilin ang kalinaw sa komunidad. (Ni Josie Serseña / EV Mail November 25-December 1, 2024 issue)
