SAN ISIDRO, LEYTE – Bisan Semana Santa walay hunong ang operasyon kontra illegal nga drugas sa San Isidro Municipal Police Station (SIMPS) ubos kang Police Captain Rexel A. De Asis, gani naaresto nila ang usa ka suspitsado sa buy-bust operation didto sa Sitio Cadaruhan, Barangay Basud, San Isidro, Leyte, niadtong April 16, 2025.
Gilangkuban ang grupo sa mga sakop sa Station Drug Enforcement Teams (SDETs) diin nasikop si alyas “Dodo,” 37 anyos, ug residenti sa nahisgutang barangay. Sa nasangpit nga operasyon nakapalit ang poseur-buyer ug usa ka paketi sa gidudahang “shabu” samtang dihang girikisa ang iyang lawas, naka-kompiska pa ang autoridad ug dugang gidudahang mga illegal nga drugas.
Tanggong na karon ang suspitsado sa SIMPS kinsa mag-atubang sa kasong pagpamaligya ug paghupot sa illegal nga drugas. Nag-kanayon pa si De Asis nga, “We remain steadfast in our fight against illegal drugs, recognizing their harmful effects on our communities. Our efforts will continue to disrupt drug trafficking and ensure offenders are held accountable.” (Ni Josie Serseña / EV Mail APRIL 14-20, 2025 issue)
