MERIDA, LEYTE – Pinaagi sa Merida Municipal Police Station, sa pagpanguna ni Police Major Ronald D. Espina, naaresto ang suspek sa insidenti sa pagpanigbas didto sa Sitio Sambag, Brgy. Puertobello, Merida, Leyte, niadtong Hunyo 19, 2025.
Sigun sa kapolisan nga 4:35 sa kadlawn sa Hunyo 19, dihang nakadawat sila ug report gikan sa PSB personnel ug “on-duty” nga Tanod sa Brgy. Puertobello kabahin sa nahitabo sa nahisgutan nga dapit. Pag-abot sa niresponding mga pulis naabtan nila ang biktima og ang suspek nga nag-inilogay sa sundang (bolo) nga ginamit sa suspitsado pagtigbas sa biktima.
Nigawas sa inisyal nga imbestigasyon nga una pa nahitabo ang insidente, gidudahan na sa suspek nga may relasyon ang iyang kapuyo ug ang biktima. Dihang nasayran nga natulog ang babayi didto sa balay sa biktima, ningadto ang suspek sa lugar para komprontahon kini.
Niresulta hinuon sa panaglalis nga maoy nagtukmod sa suspek nga tigbason ang biktima. Naka angkon ug samad ang biktima sa walang bahin nga abaga. Narekober sa mga niresponding kapolisan ang mahait nga hinagiban (bolo) nga may gitas-on nga 18 inches apil na ang pul-an. Gituhoan nga mao kini gigamit sa suspek sa krimen.
Gidala sa Merida Rescue Team ang biktima sa Gatchalian Hospital sa Ormoc City, samtang ang naarestong suspek apil ang nakumpiskang ebidensya gidala na usab Merida Police Station. (Ni Josie Serseña / EV Mail JUNE 16-22, 2025 issue)
