ORMOC CITY – Dili mo-ubos sa unom (6) ka pamilya ang nawad-an ug pinoy-anan human nga unom (6) usab ka balay ang na abo gumikan sa sunog nga nahitabo sa Barangay Tambulilid ning siyudad niadtong kadlawn sa Abril 23, 2025.
Hinuon, nasayran nga walay kinabuhi nga naangol o nakalas sa trahedya, apan nasubo ang mga biktima kay wala silay nahakot nga mga gamit tungod sa kalisang ug pagpaniguro nila nga dili sila mapaso sa nagdilaab nga kalayo.
Paspas nga nalamoy sa kalayo ang mga balay tungod kay ginama sa light materials kon kahoy ang mga estruktura. Ang mga nasunugan kasamtangan nga gi-akomodar sa barangay didto sa ilang covered court. Wala pay kompirmasyon sa autoridad ang sugilanon nga dinagkutan nga “katol” maoy hinungdan niini. Wala pa usab gibutyag kon pila ang kinatibuk-ang danyus sa nahitabong sunog. (Ni Josie Serseña / EV Mail APRIL 21-27, 2025 issue)
