ORMOC CITY – Upat ka balay ang nasunog sa Purok Rose, Brgy. Camp Downes ning dakbayan, mag alas 7:00 sa gabii niadtong Mayo 6.
Hinuon gikompirma sa taga Ormoc City Fire Station (OCFS) nga walay napaso o naangol sa maong hitabo. Nasayran nga, mga alas 6:57 sa gabii dihang nadawat sa BFP-Ormoc ang tawag kalabot sa maong sunog diin dali silang nirespondi ug naabot sa lugar mga alas 7:01. Gani halos ma-ugdaw na ang duha ka balay tungod kay mga kahoy ug light materials lang kini. Hinuon natabang pa nila ang kalayo ug wala natiwas pagka sunog ang laing duha pa ka balay.
Dugang pa nga, upat ka truck sa bombero ning syudad ang nirespondi ug usa ka ambulansya. Gideklara nga “fire under control” pagka alas 7:15 hangtod na “fire out” pagka alas 7:23. Sa inisyal nga imbistigasyon matud sa OCFS nga sa ilang bana-bana dunay danyos nga niabot sa PHP173,250.00; apan wala pa makomplito ang report sa propriedad sa mga nasunugan.
Matud pa usab nga hayan ang nabiyaan nga ceiling fan, niinit ug maoy hinungdan sa sunog nga nagsugod sa usa ka balay. Ang tolo ka pamilya kasamtangan nagpasilong sa tapad nga balay o establishemento. Tambag sa Ormoc City Fire Station nga kanunay subayon ang mga electrical wiring ug likayan ang mga substandard nga mga kagamitan nga de koryenti.(Ni Josie Serseña / EV Mail May 5-11, 2025 issue)
