KANANGA, LEYTE – Usa ka suspitsado sa pagpamaligya ug illegal nga drugas ang nadakpan sa mga elemento sa Kananga Municipal Police Station (KMPS) didto sa Manlinao St., sa Poblacion sa maong lungsod pasado ala una sa hapon (1:14 PM) niadtong sa Abril 16, 2025.
Ang buy-bust operation gipangunahan ni Police Major Romeo Q. Sudario, Jr. pinaagi sa koordinasyon usab sa PDEA-8. Arestado si alyas “Pao,” 24 anyos, olitaw, driver sa pedicab (potpot) ug nagpuyo sa Riverside, Brgy. Poblacion, Kananga, Leyte.
Nakompiska sa autoridad gikan sa suspek atul sa body search ang lima (5) ka heat-sealed transparent plastic sachets nga dunay sulod sa gidudahang shabu, ingon man ang marked money, lighter nga gisulod ug black pouch nga gipanag-iya sa suspek.
Ang mga nakompiskang ebedinsya labi na ang drugas gi-turn over sa Ormoc City Forensic Unit alang sa dugang eksaminasyon apil ang pagtimbang ug pagkompirma sa kalidad. Samtang ang suspek tanggong sa KMPS ug gipasakaan ug kaso batok sa Sections 5 and 11 of Article II of Republic Act No. 9165, o ang “Comprehensive Dangerous Drugs Act of 2002.” (Ni Josie Serseña / EV Mail APRIL 14-20, 2025 issue)
