ORMOC CITY – Sobra sa usa ka milyon ka pesos ang gi abot nga suma total nga kantidad sa illegal nga drogas ang nasakmit sa autoridad human sa gipahigayon nga buy-bust operation didto sa Sitio Pitogo, barangay San Jose ning syudad sa Ormoc niadtong Hunyo 20 mga alas 4:25 sa hapon.
Matud pa gibana bana nga dili mo menus sa PHP1,020,000.00 ang mga gidudahang shabu. Ang suspek giila nga si alyas “Cris,” 42 anyos, naka lista nga usa ka High Value Individual (HVI) ug ika lima (top 5) nga Regional Priority Target lukop Rehiyon Otso. Arestado usab ang upat ka tawo nga kauban niya sa giingong drug den nga mao sila si alyas “Nelia,” 32 anyos, “Lito,” 48 anyos, “Oni,” 24 anyos, ug “Chad,” 40 anyos. Pulos sila taga barangay Labrador, Ormoc City.
Ang operasyon gilunsad sa mga elemento sa Police Station 3, Ormoc City Police Office, Police Station 6, Police Station 2, City Intelligence Unit, Ormoc ug Regional Intelligence Division sa koordinasyon sa PDEA-8. Nakumpiska gikan sa mga suspek ang 30 ka pakete sa gidudahang shabu apil na niini ang usa ka pakete nga maoy “subject of sale” nga gibana bana nga mo timbang sa 150 gramos. Na rekober usab ang usa ka 500-peso bill nga buy-bust money. Ingon man ang usa ka caliber .45 pistol nga may pito (7) ka bala. Mag atubang ang mga suspek sa kasong paglapas sa RA 9165 o ang Comprehensive Dangerous Drugs Act of 2002, ug RA 10591 o Comprehensive Firearms and Ammunition Regulation Act. Ni Josie Sersena (EV Mail June 24-30, 2024 issue)