ALBUERA, LEYTE – Usa ka tawo ang namatay human sa pagpamusil sa Sitio Soob, Brgy. Poblacion, lungsod sa Albuera niadtong Marso 28, 2025.
Sigun sa report sa Albuera Municipal Police Station (MPS), ubos ni Police Major Angelo L. Sibunga, nga human madawat ang tawag gikan sa concerned citizen ila dayon girespondihan ang nasangpit nga shooting incident.
Sa imbistigasyon nasayran nga duha ka lalaki ang biktima nga naila nga si alyas “Alvin” og “Ramil,” ug sa ilang pag-abot sa nahitaboan gidala na sila ngadto sa tambalanan sa Ormoc pinaagi sa Albuera Emergency Rescue Unit. Apan walay swerti si alyas “Alvin” kay gideklara nga “dead on arrival” sa nag-atiman nga doktor sa OSPA-FMC.
Matud pa, tolo ka lalaki ang gitudlong suspitsado kinsa nag bonete niadtong higayona, sanglit wala sila mailhi. Gani dali usab silang naka-ikyas sa lugar ug nagpabilin pang “at large” ug padayon nga gipangita sa autoridad.
Hinuon nisaad ang kapolisan nga maningkamot sila aron makab-ot sa mga biktima ang hustisya. “We are committed in seeking justice for the victims and their families,” matud pa ni Sibunga. “Our team is working tirelessly to investigate this case and ensure that those responsible are held accountable,” dugang pa niini.
Nitabang usab ang Regional Forensic Unit 8 sa imbistigasyon pinaagi sa pagproceso sa crime scene ug pagkolekta sa mga ebedinsya. Nag-awhag ang Albuera MPS kinsa kadtong dunay impormasyon sa mga suspitsado nga mo-kooperar ug kontakon kini nga numero 0905-525-4417, o kaha sa email nga albueramps@yahoo.com.ph, o sa social media accounts nga Albuera Pnp (FB Account) og Albuerapnp (FB Page). (Ni Josie Serseña / EV Mail March 24-30, 2025 issue)
