TABANGO, LEYTE – Nag-unang gisuspitsahan (primary suspect) ang usa ka lalaki nga uyab sa babayi kinsang patay nga lawas napalgan nga naglutaw sa dagat.
Mahinumdoman nga ang mga personnel sa Tabango Municipal Police Station (MPS), sa superbisyon ni PCPT Anthony-Re B. Amora, nirespondi sa nadawat nga tahu kalabot sa naglutaw nga lawas ug wala nay kinabuhi nga babayi sa dagat sakop sa Barangay Sta. Rosa, Tabango, Leyte.
Nadiskobrihan kini mga 30 kilometers gikan sa lapyahan pinaagi sa lokal nga mangingisda sayo sa kadlawn niadtong Abril 7, 2025. Pagrespondi sa kapolisan gika-uban nila ang barangay officials og mga tanod kinsa maoy nitabang pagkuha sa lawas gamit ang sakayan nga pump boat.
Mismong ang pamilya ang niila sa biktima nga si alyas “Nyl.” Una na kining gikatahu nga nawala sukad niadtong Abril 2, 2025. Ug sol-ot niini ang brown shorts ug pink sleeveless crop-top shirt. Sa inisyal nga imbistigasyon gibutyag nga dihang nakit-an dunay pisi nga gihigot sa liog sa biktima ug ang pikas tumoy gibutangan ug bug-at nga bato. Ang mga saksi usab matud pa nga gika-uban pa niini ang iyang uyab sa wala pa ang hitabo. Hinungdan nga ang maong “boyfriend” ang gikonsidera isip “primary person of interest” sa nasangpit nga kaso.
Gipaninguha sa kapolisan sa Tabango nga mahatagan ug hustisya ang kamatayon sa biktima. “We are now working closely with the Scene of the Crime Operatives (SOCO) and other investigative units to ensure a thorough and impartial investigation. Let me assure the public, and especially the grieving family, that we are committed in seeking the truth and holding accountable those responsible,” pulong pa ni PCPT Amora. (Ni Josie Serseña / EV Mail APRIL 7-13, 2025 issue)
