KANANGA, LEYTE – Nag-atubang karon ug kaso kontra sa Republic Act No. 9165 ang usa ka 58 anyos nga lalaki human naaresto sa hiniusang pwersa sa Kananga Municipal Police Station (MPS) ubos kang Police Major Romeo Q. Sudario, Jr., ug PNP DEG SOU 8 nga maoy nanguna sa operasyon ubos usab kang PLT Arwin U. Perez, kauban pod ang PDEA Ormoc City Office/SIU, CIT Ormoc-RIU8, RID 8, RPDEU 8 ug PDEU Leyte PPO.
Ang drug buy-bust operation gilunsad mga alas 11:51 sa gabii niadtong Mayo 30, 2025, didto sa Brgy. Tugbong, Kananga, Leyte. Ang suspek giila nga si alyas “Ruben,” 58 anyos, residenti ra usab sa nahisgutang dapit. Nabutang siya sa kategoryang High Value Individual (HVI) sa Regional Level.
Nakumpiska gikan sa suspek ang mga paketi sa gidudahang shabu nga gibana-bana sa 40 gramos ug nagkantidad sa PHP272,000.00. Nakuha usab ang marked money nga maoy gigamit sa autoridad pagpalit kaniya sa illegal nga drugas.
Human gimarkahan, gisumiti ang mga ebedinsya sa Ormoc City Forensic Unit para sa dugang eksaminasyon, samtang ang suspitsado gidala sa Kananga MPS diin natanggong pa kini hangtod ning pagbalita. Kasong kalapasan sa Sections 5 ug 11 sa Article II sa Republic Act No. 9165 o ang Comprehensive Dangerous Drugs Act of 2002. (Ni Josie Serseña / EV Mail June 2-8, 2025 issue)
