ORMOC CITY – Atul sa 2nd Quarter PMAC/PFSAC Meeting, hugot nga gihimakak sa pamunuan sa Philippine Ports Authority (PPA) Western Leyte/Biliran nga walay kamatuoran ang gipasangil, sa usa ka alyas “Liza” nga gapraktis ug korupsyon sa mga pantalan ug sa ahensya.
“First come first served” ang polisiya sa pantalan ug giimbistigahan na sa PPA ang maong alegasyon; sanglit “walay luna ang korupsyon” sa ilang buhatan, matud pa ni Port Manager Bernard C. Calledo.
May mga pagka disgusto sa mga byahidor nunot sa temporaryong pagsira sa makasaysayan nga San Juanico Bridge sa Tacloban City pila ka buwan na ang nakalabay. Pero walay pormal nga naglunsad ug reklamo – mapasahero man o byahidor sa mga kargaminto. Hagit pa ni Port Manager nga unta “barugan” sa reklamante kon duna may reklamo kay dili sayon nga mantsahan ang pangalan sa PPA ug mga empleyado niini.
Dugang pa sa pamunuan sa ahensya nga may mga higayon nga hatagan ug konsiderasyon ang mga byahidor sakay sa “barge” kadtong mga dali nga madaot sama sa produktong utanon ug prutas. Pero unta mas magbaton ug respeto ang matag usa.
Ang “issues and concerns” usa lang sa mga agenda nga gituki atul sa PMAC Meeting kada tolo ka bulan (quarterly) sa usa ka tuig. Nga naglakip sa kalamboan sa pagdumala sa mga pantalan pribado man o kadtong gitunol na sa LGU.(Ni Josie Serseña / EV Mail JULY 21-27, 2025 issue)
