ISABEL, LEYTE – Nakuyapan ang usa ka lalaki human kini gihapak ug bato sa ulo.
Naaresto ra usab ang suspek nga hubog. Nahitabo ang insidenti niadtong Agusto 23, 2025 sa Brgy. Mahayag, Isabel, Leyte.
Naila ang biktima nga si alyas “Ed,” 57 anyos, kinsa naglingkod lang niadtong higayona gawas sa gym sa maong barangay, dihang kalit lang niabot ang hubog nga suspek nga si alyas “JR,” 25 anyos. Sa walay igong rason gipusposan niini ug bato ang biktima nga parihas silang nagpuyo sa nasangpit nga barangay.
Dali nga niikyas palayo ang suspitsado. Samtang ang biktima nakapangayo pag panabang sa iyang paryenti, apan tungod sa naangkon nga samad sa ulo nalipong dayon nahagba kini. Nadala ra dayon ang biktima sa Isabel Emergency Hospital.
Sa laing bahin, nagpahigayon dayon ug “hot pursuit operation” ang personnel sa Isabel Municipal Police Station (MPS), nga niresulta sa pagka-sikop sa suspitsado. Natanggong ang suspek sa Isabel MPS. (Ni Josie Serseña/ EV Mail AUGUST 25-31, 2025 issue)
