Dear Atty. Golo,
Ingon sila kurap ang Congressman, okey ra man basta dako hatag inig eleksyon. Tag 5 mil ako nadawat adtong 2025. Pag 2022, 4 mil. Basin sa 2028, 6 mil na. Ang amo Congressman way puli-puli. Kon pulihan, di na me kadawat. Naa man kaha suwat sa mga Pari, ngano apil-apil man na sila? Ang mga Congresman mag-andam jud og dako nga kwarta para eleksyon, kay modwat man ang mga tawo. Diha man kahay namatay sa baha, luoy pod ta. Hatagan lang to og libre lungon. Pwede, ang Contractor ray prisohon way labot ang Congressman. Mingawon ko ni Pare Congressman.
PareNiCongressman,
Mr. Roman
Dear Mr. Roman,
Si Gelo, college student, namatay tungod sa Leptospirosis. Tulo ka adlaw ang baha sa Manila. Milatas siya sa baha kay nangita sa iyang Tatay. Ang mga Pari, naluoy sa atong nasud. Matod sa CBCP, ang mga Contractor, DPWH, COA og mga Politiko, investigahon. Ang namalit og boto, maoy Kurap numeru uno. Ang atong mga Politico mga Kurap tungod na nimo. Maayo pod ka prisohon, 6 years imo priso pagbaligya sa imo boto (Sec. 261, BP 881). Si Congressman, kon “Plunder” ang Kaso, “life sentence.” Aron di ka mingawon ni Pare nimo, hangyoa ang “Warden” mag-uban mo og selda.
Imo Amigo,
Manny G. Golo
Manny G. Golo (EV Mail SEPTEMBER 8-14, 2025 issue)
