ISABEL, LEYTE – Nadakpan ang usa ka lalaki ug nakuha sa iyang posisyon ang mga gidudahang shabu atul sa gipahigayon nga buy-bust operation didto sa Brgy. Marvel, lungsod sa Isabel hapon niadtong Septiembre 6, 2025.
Ang suspek giila nga alyas “Titing,” 43 anyos, ug residenti sa nahisgutang barangay.
Ang operasyon gipangunahan sa Isabel Municipal Police Station Drug Enforcement Team. Wala damha sa suspek nga police diay ang poseur-buyer nga iyang ka transaksyon. Nakuha kaniya ang lima (5) ka paketi sa gidudahang shabu ingon man ang gimarkahan nga buy-bust money.
Ang mga nakompiskang ebedinsya gisumiti na sa Regional Forensic Unit 8 alang sa gitawag nga “qualitative and quantitative examination.” Gikasuhan na si alyas “Titing” sa paglapas sa Section 5 (Sale of Dangerous Drugs) ug Section 11 (Possession of Dangerous Drugs) sa Article II sa RA No. 9165, o Comprehensive Dangerous Drugs Act of 2002. (Ni Josie Serseña/ EV Mail SEPTEMBER 8-14, 2025 issue)
