SAN ISIDRO, LEYTE – Patay ang usa ka lalaki nga giingong Konsehal sa usa ka Barangay human kini gipusil pasado alas singko sa hapon niadtong Septiembre 6, 2025 didto sa may Sitio Kabgan, sakop sa Brgy. Biasong, lungsod sa San Isidro didto sa Third District.
Ang kapolisan niila sa biktima nga si alyas “Jikoy” nga taga Brgy. Tabing, Tabango, Leyte.
Sigun sa report nga nag-byahi na unta aron mopauli ang biktima sakay sa iyang Honda TMX motorcycle gikan sa sabungan sa San Isidro Cockpit Arena. Apan pag-abot sa may Sitio Cabgan, Brgy. Biasong, kalit lang kining gipusil sa duha ka wa mailhing suspitsado nga naka helmet ug nag-sakay sa kolor blue nga motorsiklo. Nakaangkon ug igo sa kalawasan ang biktima nga niresulta sa iyang hinanali nga kamatayon.
Samtang ang mga suspek niikyas paingon sa Poblacion sa lungsod sa San Isidro. Nag-lunsad dayon ug dragnet og hot pursuit operation ang San Isidro Municipal Police Station (MPS) pero wala na masakpi ang riding-in-tandem nga mga suspitsado, hinuon nagpadayon ang imbistigasyon ug pagsusi niini nga kaso kon unsay motibo sa krimen. Ang Scene of the Crime Operatives (SOCO) usab nagpahigayon dayon ug “crime scene investigation,” aron makatabang sa pagsulbad sa maong shooting incident. (Ni Josie Serseña/ EV Mail SEPTEMBER 8-14, 2025 issue)
