TANAUAN, LEYTE – Daling girespondihan sa Tanauan Municipal Police Station ug naaresto ang suspek sa shooting incident nga nahitabo sulod sa Tanauan School of Craftsmanship and Home Industries sa Brgy. Canramos, sa maong lungsod niadtong buntag sa Oktobre 16.
Ang suspek giila nga si alyas “Tatoy,” 46 anyos, walay trabaho, ug residenti sa Brgy. Sto. Niño, Tanauan, Leyte.
Nasayran nga .38 caliber revolver ang gigamit niini sa pagpusil sa maestra nga iya diayng asawa. Apan nasayran usab nga dugay nang nagbuwag ang duruha.
Matud pa nga luwas na ang 48 anyos nga biktima human dali nga nadala sa mga estudyanti ngadto sa tambalanan. Samtang ang bana nga maoy suspek natanggong na sa Tanauan Municipal Police Station, kinsa atul sa pagsikop nisuway pa ug pasakit sa iyang kaugalingon gamit na usab ang sundang. Selos ang gitudlo nga hinungdan sa maong pagpamusil. Ni Josie Serseña (EV Mail OCTOBER 13-19, 2025 issue)
