KANANGA, LEYTE – Niresulta sa krimen diin usa ka lalaki ang napusilan tungod sa away sa yuta, diin arestado ang suspek sa nahitabong shooting incident hapon niadtong Oktobre 23 sa Sitio Busay, Brgy. Libongao, Kananga, Leyte.
Ang biktima mao si alyas “Patoy,” 33 anyos, truck helper, lomolopyo sa nahisgutang barangay. Samtang ang suspitsado naila nga si alyas “Josep,” 52 anyos, mag-uuma ug taga didto ra usab. Sigun sa tahu sa Kananga Municipal Police Station nga nag-ugat ang krimen sa panaglalis sa duruha tungod sa dugay nang kasungian sa yuta.
Gikan sa panaglalis nilakaw ang suspek ug pagbalik nagdala na ug armas ug gipusil ang biktima kinsa naigo sa nagkalain-laing parti sa lawas. Pinaagi sa Kananga Emergency Rescue Team nadali pagdala ang biktima ngadto sa Kananga Municipal Hospital alang sa “initial treatment,” pagkahuman gibalhin ug tambalanan ngadto sa Tacloban City .
Ang Scene of the Crime Operatives (SOCO) nga niproceso sa lugar nakakuha og lima (5) ka fired cartridge cases sa caliber .45. Pagka mga alas 11:50 P.M. sa maong petsa pinaagi sa pagtudlo sa Kagawad nadakpan ang suspek didto sa Brgy. Libongao. Kini pinaagi usab sa hot pursuit operation sa taga Kananga MPS nga nakig koordinasyon sa 2nd Leyte Provincial Mobile Force Company.
Narekober sa posisyon sa suspek ang .45 caliber pistol nga may sulod nga magazine ug duha ka “live rounds of ammunition,” diin gituhoang maoy gigamit sa krimen. Tanggong na sa kwerpo sa kapolisan sa Kananga ang maong suspek. Ni Josie Serseña (EV Mail OCTOBER 20-26, 2025 issue)
