ORMOC CITY – Alaot ang naangkon sa usa ka empleyado ug kinahanglan ug major operation human pusila sa agawn.
Gikan sa kasaligang tinubdan, gibana-bana nga moabot ug two hundred thousand pesos (PHP200,000.00) o sobra pa ang unang galastohan sa maong pasyenti. Hinuon naaresto dayon sa taga Ormoc City Police Station 1 ang suspek sa maong pagpamusil didto sa Osmeña St., Brgy. South, Ormoc City, buntag niadtong Oktobre 23. Nailhan kini nga si alyas “Doming,” 79 anyos, minyo, kontractor, ug residenti sa Osmeña St., Brgy. South, dakbayan sa Ormoc.
Sa inisyal nga imbistigasyon nasayran nga gisugo ang biktima sa anak sa suspek sa pagkuha ug mga gamit sa “catering” sama sa kaldero, kalaha ug uban pa didto sa ilang balay. Pero may nauna nang deperensyaay sa buot ang amahan ug anak nga may kalabotan sa maong mga butang, diin gidid-an na sa amahan ang pagpakuha sa mga gamit pang catering.
Dihang didto na sa sulod sa balay ang empleyado, gikompronta siya sa suspek kalit dayon siyang gipusil sa maka daghan gamit ang 9mm pistol. Naigo ang biktima sa lain-laing parti sa lawas partikular sa “right hand, left side of the lower stomach, left side of the face.” Nadala kini dayon sa Ormoc Rescue Team ngadto sa pinaka duol nga hospital.
Nidangat naman usab dayon sa lugar ang taga Leyte Provincial Forensic Unit, gikan sa Baybay City aron e-proceso ang crime scene. Narekober sa SOCO ang walo (8) ka fired cartridge cases ug duha (2) ka blood swabs. Nakuha usab sa autoridad gikan sa suspek ang armas pinaagi sa gipahigayon nga hot pursuit operation. Ipa-ilawom kini sa Firearm Verification, Ballistic ug Cross Matching-Examination, apil na ang Gun Powder Residue Examination.
Ipa-ilawom usab ang suspitsado sa Paraffin Examination. Giandam sa kapolisan ang mga impormasyon aron ipasaka ang kaso batok sa kontractor.Ni Josie Serseña (EV Mail OCTOBER 20-26, 2025 issue)
