ORMOC CITY – Sa gipahigayon nga 3rd Quarterly Meeting sa Port Management Advisory Council (PMAC) og Port Facility Security Advisory Committee (PFSAC), usa sa mahinungdanong agenda nga gihisgutan ang updates sa mga nagka daiyang projekto sa ahensya; apil na usab ang mga kalamboan sa pasilidad ug kahimtang sa seguridad lukop Western Leyte, Biliran ug Southern Leyte nga ubos sa hurisdiksyon sa Ormoc Port Management Office.
Sa report pinaagi sa Engineering Department nasayran nga naa na sa 43.59% niadtong bulan sa Septiembre ug nagpadayon na human kasamtangang naundang sa maka diyot. Nakakuha ug “time extension” ang konstruksyon sa pantalan sa dakbayan sa Ormoc hangtod sa Pebrero 2026. Samtang sa Hilongos Port naa na sa 47.22%, sa Guadalupe 76%, sa Limasawa 24%, ug daghan pang ubang kalamboan.
Atubangan sa mga miembro sa PMAC/PFSAC giklaro ni Port Manager Bernard Calledo nga walay ghost project sa PPA sa lugar ubos sa iyang pagdumala, dugang pa niya, “We don’t have ghost projects.” Hinuon duna may delay o pagkalangan sa uban tungod sa mga sitwasyon nga dili malikayan. Pero gisiguro sa PPA Manager nga dili pwedi sa ilang ahensya ang substandard gani “our structure is super standard,” pulong pa niini.
Sa laing bahin, subli nga nagpahimatngon si Port Manager Callado sa mga nanag-iya ug pantalan labi na ang naisyuhan na ug show cause order nga asikasohon ang mga papel kay kon mapakyas pa gihapon sa pag “comply” sa requirements mosunod niini ang kamanduan sa cease and desist order na gikan sa Legal Department sa Head Office sa PPA. “I hope dili moabot sa punto nga masira ug dili na maka operate,” dugang pa niya.
Tambag pa niini nga kon dunay plano mag-construct, mokonsulta una sa ahensya, kay dili lalim ang gastos ug panahon unya padung ra sa pagka-sira. Busa namahayag na usab siya ug “last warning” labi na sa Private Ports nga mag-repair o mag-develop nga bisitahon ang ilang opisina aron matambagan sa insaktong proceso. Ni Josie Serseña (EV Mail OCTOBER 27-NOVEMBER 2, 2025 issue)
