MATAG-OB, LEYTE – Usa ka notadong tig gamit ug tig pamaligya sa illegal nga drugas ang nasikop sa buy-bust operation nga gipasiugdahan sa Matag-ob Municipal Police Station (MPS) sa pagpanguna ni Police Major Ted Dennis O. Clemencio niadtong Oktubre 23 sa Brgy. Sto. Rosario, sa maong lungsod.
Giila ang suspek sa alyas nga “Mak,” hingkod ang pangidaron ug residenti sa nahisgutang lugar, kinsa niangkon sa salaud. Naaresto siya human usab gidawat ang buy-bust money gikan sa operatiba nga nagpaka-aron ingnun nga kustomer.
Nakuha gikan kaniya ang mga paketi sa gidudahang shabu nga gisulod sa sudlanan sa pusporo, lakip na ang five hundred pesos (PHP500.00) nga buy-bust money. Gipailawom na ang suspek sa Inquest Proceeding sa Piskaliya ug tanggong na sa Matag-ob MPS. Nag-atubang siya sa kasong paglapas partikular sa Sections 5 og 11, Article II sa Republic Act No. 9165 o Comprehensive Dangerous Drugs Act of 2002. Ni Josie Serseña (EV Mail OCTOBER 27-NOVEMBER 2, 2025 issue)
