MATALOM, LEYTE – Hugot nga imbistigasyon ang gihimo karon sa Leyte Police Provincial Office (LPPO) kalabot sa laing insidenti na pod sa pagpamusil sa maestra sulod sa eskwelahan, nga nahitabo niadtong buntag sa Oktobre 22 sa Agbanga Elementary School, Brgy. Agbanga, lungsod sa Matalom.
Giila ang biktima nga si alyas “Elen,” 39 anyos, minyo ug magtutudlo sa nahisgutang eskwelahan, samtang ang suspek mao ang mismong bana sa biktima nga si alyas “Lino,” 49 anyos, walay trabaho nga taga Brgy. Caridad Sur, Matalom, Leyte.
Base sa report nga nakadagan ang biktima nga nangayo ug tabang sulod sa classroom ni alyas “Marisa,” dihang gisunod siya sa suspek ug gipusil sa maka daghan gamit ang wala mailhing kalibre sa armas hinungdan sa hinanali niyang kamatayon. Dali nga nisibat ang suspek sakay sa Suzuki mini-van paingon sa Matalom proper.
Pagkadawat sa tahu sa Matalom Municipal Police Station, dali nga naglunsad dayon sa hot pursuit operation ug nakig koordinasyon sa mga silingan nga enforcement units aron magpahigayon ug dragnet operation. Apan sa gipahigayon nga follow-up operation, nadiskobrihan na lang ang suspek nga wala nay kinabuhi didto sulod sa iyang pinoy-anan.
Sa inisyal nga imbistigasyon gibutyag nga naghikog (suicide) ang suspek. Ang mga personnel gikan sa Baybay City PFU SOCO maoy nag-proceso sa crime scene. Samtang ang Municipal Health Officer maoy gihangyo alang sa post-mortem examination. Ni Josie Serseña (EV Mail OCTOBER 20-26, 2025 issue)
