ORMOC CITY – Nasikop ang usa ka babayi nga suspek sa buy-bust operation sa taga Ormoc City Police Station 4 (OCPS-4) Drug Enforcement Team nga nakig kolaborasyon sa Philippine Drug Enforcement Agency (PDEA).
Nahitabo kini didto sa Brgy. Linao, ning dakbayan niadtong Septiembre 23 sa buntag. Giila ang suspitsado nga si alyas “Ann,” 40 anyos, dalaga, walay trabaho ug taga Islaverde sakop sa Brgy. West, Ormoc City. Apil siya sa kategorya sa mga Street Level Individual (SLI).
Nakompiska gikan kaniya ang duha (2) ka paketi sa gidudahang shabu, usa (1) ka genuine five-hundred-peso bill (PHP500.00) nga buy-bust money ingon man ang usa (1) ka belt bag. Sa iyang pagka sikop gipasabot siya sa salaud ingon man sa iyang mga katungod sa pinolongan nga iyang masabtan.
Dayon gidala na siya sa OCPS-4 diin siya naka-ditinir pa karon. Samtang, ang mga ebedinsya gidala sa Ormoc City Forensic Unit sa Brgy. Camp Downes, Ormoc City. Kasong kriminal tungod sa paglapas sa Sections 5 and 11 ubos sa RA No. 9165 o Comprehensive Dangerous Drugs Act of 2002 ang gipasaka na batok kaniya. Ni Josie Serseña (EV Mail SEPTEMBER 22-28, 2025 issue)
