ORMOC CITY – Narekopo sa Ormoc City Police Office (OCPO) ang armas apil na ang mga bala ug illegal nga drugas gikan sa mga suspek atul sa operasyon niadtong Hulyo 7, 2025 didto sa Sitio Talong, Barangay Liloan, dakbayan sa Ormoc.
Ang grupo sa mga operatiba naglangkob sa Ormoc Drug Enforcement Unit, sa koordinasyon sa Ormoc City Police Station 3 (OCPS-3), Ormoc City Intelligence Unit, PNP Drug Enforcement Group-SOU8 og CIT-RIU-8.
Ang buy-bust operation niresulta sa pagka-aresto sa duha (2) ka High-Value Individuals (HVIs) ug usa (1) ka Street-Level Individual (SLI) nga giila sa ilang mga alyas nga “Jun-jun,” 42 anyos, taga Villa Theresa Subdivision, Brgy. San Isidro, Ormoc City (HVI), alyas “Palong,” 42 anyos, jobless, residenti sa Sitio Talong, Brgy. Lilo-an, Ormoc City (HVI), alyas “Ann,” 42 anyos, jobless, lomolopyo gihapon sa maong lugar ug usa siya ka SLI.
Ang mga nakuhang ebidensya nag-apil niining mosonud; gikan sa posisyon ni alyas “Jun-jun” ang upat (4) ka paketi nga may sulod nga white crystalline substance o ang gidudahang shabu, lain pang usa (1) ka genuine subscribed PHP500.00 bill nga maoy buy-bust money, lima (5) ka PHP500.00 bills isip bogus money, osa (1) ka black sling bag, usa (1) ka .38 caliber revolver nga may duha (2) ka buhing bala, usa (1) ka buok bala sa shotgun (ammunition), ingon man cash nga PHP200.00.
Samtang gikan gihapon sa posisyon ni alyas “Palong” mao ang lima (5) ka paketi sa gidudahang shabu, usa ka (1) black coin purse; ug cash nga PHP150.00. Samtang gikan usab sa posisyon ni alyas “Ann” ang duha (2) ka paketi sa gidudahang shabu nga gisulod sa gamay nga karton sa sigarilyo.
Ang mga nakompiskang ebedinsya nga illegal nga drugas gidala sa Regional Forensic Unit 8, sa Camp Sec. Ruperto Kangleon, Campetic, Palo, Leyte. Gipasabot ang mga suspitsado sa ilang mga katungod ubos sa Miranda Doctrine, dayon gidala sila sa OCPS-3. Manubag sila ug kaso batok sa RA No. 9165, o ang Comprehensive Dangerous Drugs Act of 2002. (Ni Josie Serseña / EV Mail JULY 7-13, 2025 issue)
