ORMOC CITY – Duha ang nasikop sa buy-bust operation kinsa ang usa bag-o lang ni-graduar sa kursong Criminology.
Pinaagi kini sa sa koordinasyon sa PDEA RO8, Ormoc City Police Station 1 Drug Enforcement, ug Ormoc City Drug Enforcement OCIU. Ang operasyon didto gipahigayon sa Brgy. Cogon, Ormoc City, hapon niadtong Septiembre 11, 2025.
Giila ang mga suspek nga sila si alyas “Kokoy,” 44 anyos, usa ka vendor, taga Purok Jasmin, Brgy. Cogon, Ormoc City, ug usa siya sa mga High Value Individual (HVI); ug alyas “Justin,” 25 anyos, dili minyo, fresh BS Criminology graduate, residenti sa Brgy. Manlilinao, Ormoc City, pero hinuon usa lang siya ka Street Level Individual (SLI).
Nakuha sa posisyon ni “Kokoy” ang sling bag nga may sulod nga usa (1) ka gi-subscribed nga one-thousand peso bill (PHP1,000.00) nga maoy buy-bust money, siyam (9) ka bogus money nga tag one-thousand peso bills (PHP1,000.00); usa (1) ka Smith and Wesson caliber 357 revolver nga may lima (5) ka buhing bala ug duna pay reserba nga upat (4) ka bala, duha (2) ka paketi sa gidudahang shabu nga gibana-bana nga nitimbang ug 4.39 grams (Subject of Possession); didto usab sa iyang bulsa sa shortpants ang four (4) hundred pesos (PHP400.00).
Si “Justin” nakuhaan sa tuong bulsa niining mosunod: usa (1) ka selopin sa odong nga may unom (6) ka paketi sa gidudahang shabu, nga dunay estimated weight nga 4.39 grams, ug five hundred pesos (PHP500.00). Human sila pasabta sa ilang katungod base sa Miranda Doctrine gidala na sila sa Ormoc City Police Station 1. Nag-atubang silag kasong violation sa R.A. No. 9165 (Comprehensive Dangerous Drugs Act) og sa R.A. No. 10591 (Comprehensive Firearms and Ammunition Regulation Act). (Ni Josie Serseña/ EV Mail SEPTEMBER 15-21, 2025 issue)
