ORMOC CITY – “Gihimo ang balaod para sa ato kaugalingon benipisyo,” kini ang kusganong mensahi ni Mr. Rosilito T. Ygaña, ang Senior LEO-WLFO Head atul sa gipahigayon nga Capacity Building for Manpower Services didto sa Multi-purpose Hall sa Ormoc City Hall niadtong nilabay nga Huebes.
Sagad sa nitambong sa programa ang mga Security Guards ug mga susamang mga trabahanti dinhi sa Ormoc og sa ubang lugar sama sa Baybay, Albuera, Isabel ug uban pa nga sulod sa hurisdiksyon sa Western Leyte Field Office sa Department of Labor and Employment (DOLE).
Dugang pa ni Ygaña nga dili lalim ang trabaho sa mga guardya nga magprotihir sa kinabuhi ug propriedad sa ilang gibantayan, kay ilang girisgo ang kaugalingong kinabuhi labina panahon sa gabii nga duty. Apan dili sad nila hikalimtan nga angay sad gihapon nila protiksyonan ang ilang kaugalingon.
Gipahinumdoman pa sa DOLE ang participants nga dili lang sila nanarbaho para sa pamilya, pero apil na ang pamilya sa ilang kauban, ingon pa, “we should treat our co-worker as family.” Ang ubang bahin sa tibuok adlaw nga programa naglangkob sa pagpasabot ubang baload sa DOLE ug katungod nga benipisyo sa empleyado sama sa D.O. 174, ug bisan ang giya sa pagpa ilawom sa grupo o Freedom of Association (FOA) ug daghan pang uban. Ni Josie Serseña (EV Mail OCTOBER 6-12, 2025 issue)
