MATAG-OB, LEYTE – Arestado ang duha ka lalaking suspitsado sa pagpamaligya ug illegal nga drugas (drug pusher) atul sa gipahigayon nga buy-bust operation sa magkalaing higayon ug lugar sa lungsod sa pagpanguna sa Matag-ob Municipal Police Station ubos kang Police Major Ted Dennis O. Clemencio, sa koordinasyon ug kaabag sa Philippine Drug Enforcement Agency (PDEA).
Ang suspek nga si alyas “Jay” nasikop niadtong Hulyo 11, 2025 sa gabii, didto sa Sitio Kawa, Brgy. Sto. Rosario, lungsod sa Matag-ob. Gidakop siya human modawat sa “marked money” gikan sa autoridad nga nagpaka-aron ingnun nga kustomer. Nakuha sa posisyon niini ang 500 pesos (PHP500.00) nga buy-bust money ug tolo ka paketi sa gidudahang shabu, diin ang usa niini mao ang “subject of sale.”
Samtang ang usa ka SLI nga si alyas “Jerry,” 40 anyos, nasikop gabii sa Hunyo 30, 2025 didto sa Brgy. Balagtas, Matag-ob, Leyte. Napalitan gihapon siya ug usa ka paketi sa gidudahang shabu balor ug 500 pesos (PHP500.00), ug may nakompiska usab sa iyang posisyon nga upat (4) ka paketi sa gidudahang illegal nga drugas.
Pulos na sila napa-ilawom sa inquest proceeding sa piskaliya ug tanggong na hangtod karon sa Matag-ob Municipal Police Station. Pariho usab silang gikasohan ug kalapasan sa Sections 5 ug 11 sa Article II sa Republic Act No. 9165, o ang “Comprehensive Dangerous Drugs Act of 2002, as amended under R.A. No. 10640.”
Gisiguro sa kapolisan sa maong lungsod ang padayon nilang kampanya kontra sa illegal nga drugas aron magpabiling malinawon ang komunidad. “This successful operation is a proof of our police’s relentless campaign against illegal drugs. Our community partners in maintaining peace and order,” matud ni COP Clemencio. (Ni Josie Serseña / EV Mail JULY 14-20, 2025 issue)
