Dear Atty. Golo,
Diha man kahay napaakan sa Cobra nga bata didto sa Southern Leyte, unya namatay kay way anti-venom ang hospital, tinood? Wa konoy “budget” para anti-venom. Nag “search” ko sa “Google”, tag 3 mil ra man ang anti-venom. Asa na man diay ang kwarta? Pag eleksyon, tag 5 mil ang palit sa boto. Naka “cellphone” gud ko kay 10 mil man ang ako nadawat, apil sa ako bana. Dapat, ang hospital mopalit og anti-venom kay aron di mamatay ang mapaakan. Gi labtan tingali sa doctor ang kwarta para anti-venom? Maayo unta ang doctor maoy mapaakan.
NalooySaNapaakan,
Mam An-an
Dear Mam Ans,
Dili kompleto ang mga tambal sa mga hospital kay kuwang ang “budget.” Ayaw pasanginli ang doctor kay nag servisyo lang na sila. Ang politico maoy magbuhat sa “budget” (RA 7160). Sila pod ang maglabot, kay gipalit og boto, apil na ang imo. Kadtong 10 mil nadawat nimo, tulo na unta to ka “anti-venom.” Wa unta to mamatay ang napaakan. Peru daghan ang nangamatay tungod kay way anti-venom. Ang daghan mao ang “venom” sa mga politico. Ang venom sa cobra, makapatay lang sa napaakan. Ang venom sa politico, makapatay natong tanan.
Imong amigo,
Manny G. Golo
Manny G. Golo (EV Mail JUNE 30-JULY 6, 2025 issue)
