Dear Atty. Golo,
Tinood, ang Speaker ang iya anak og asawa, puros Kongresista? Tulo na sila. Di ba dunay balaod nga nagdili sa political dynasty? Unfair namo, kame way trabaho. Ang ako bana, sige lang tigbakay. Ang ako anak, estambay. Bisan unsaon pang “apply,” di dawaton kay wa ka “graduate” og high school. Unsaon, gahi ma’g U. Di patoo. Paeskwelahon, magsige katug. Wa nay ugma ning aho anak. Ang Kongresman, I.T., Ila Tanan kwarta. Ang amo, T.L., amo Tanan Langaw.
KontraDynastiya,
Ignacia
Dear Ignacia,
Segun sa balita, molingkod ang asawa sa Speaker pagka Kongresista sa Tingog Partylist. Ika-unom siya nga “nominee.” Ang iya anak, maoy First Nominee sa Tingog. Tulo na sila sa Kongreso. Ang ato Batakang Balaod, nagsugo sa Kongreso pagpasar og balaod batok sa Political Dynasty (Art. II, Sec. 26, Constitution). Peru, hangtod karon, wa na nila buhata. Gahi og U ning mga Kongresista. Ayaw pakawa sa paglaum. Ang imo anak, gahi man og U, mora pod og Kongresman.
ImoAmigo,
Manny G. Golo
Manny G. Golo (EV Mail JULY 14-20, 2025 issue)
