Dear Atty. Golo,
Nag-away kono ang “manager” ni Elias og ang iya Kabit? Way buot ang manager, ngano si Elias ang gipataod sa iya “garland” pag “graduate” niya nga may bana man siya. Ingon pa siya nga way katungod masuko ang “live-in partner” ni Elias kay walay “marriage contract.” Mora man siya’g nalabad, kinsa gani to iya ngan? Ganahan ko ni Elias kay inig sayaw mag keyod-keyod. Sana ingana ang ako bana. Peru, di na man mopansin nako. Maayo pa ang hiniktan, kay kada kaadlawon ang paa hikaphikapon. Pwede makig buwag ko ni Topacio, naglagot ko kay mas pinanga pa niya ang manok kay sa akoa.
MuseEliasFansClub,
Mrs. Igwad-igwad
Dear Mrs. Igwad-Igwad,
Ang kaminyoon usa ka espesyal og permanente nga panaghiusa sa bana og asawa nga maoy dugokan pagtukod og pamilya (Art. 1, Family Code). Ang kaminyoon angay palamboon og dili buwagon tungod lang sa rason nga way hinungdan. Ang paghikap sa paa sa hiniktan mao ang pagsuta kon lig-on na ang tiil sa manok aron pwede na itupada. Ayaw buwagi si Topacio. Alalayi siya kay imo siyang bana. Dili pod maayo nga mora’g ganahan na hinoon ka ni Elias. Bisan way talent si Topacio, gipakaslan ka niya. Ayaw na pangandoy og maayo mokeyod-keyod, peru igo lang ka kaithan.
Imong Amigo,
Manny G. Golo
Manny G. Golo (EV Mail AUGUST 4-10, 2025 issue)
