TUNGA, LEYTE – Mismong ang mga miembro sa Leyte Police Provincial Office (LPPO) ang nidakop sa police nga opisyal human niini gipusil ang kainom.
Ang insidenti nahitabo didto sa Brgy. Balire, lungsod sa Tunga, Leyte niadtong Septiembre 21. Ang biktima giila nga si alyas “Jonar,” 56 anyos, mag-uuma ug residenti sa Brgy. Parag-um, Carigara, Leyte.
Samtang ang suspek giila nga si alyas “Nonoy,” 53 anyos, og residenti sa Brgy. Abango, Barugo, Leyte. Sa inisyal nga imbistigasyon matud pa nga nag-inum silang duha sa balay sa iyaan sa suspek ug didto nahitabo komosyon nga nahatod sa trahedya. Sumala pa sa police report nga nahubog ang biktima ug nibunot sa kutsilyo ug gidunggab ang suspek. Nakalikay ang suspek ug nipabuto ug “warning shot.”
Apan dihang nagpadayon gihapon pag-atake ang biktima, gipusil na kini sa suspek diin naigo sa liog. Nadala pa kini sa Carigara District Hospital, apan gideklara sa doktor nga patay na. Giaksyonan dayon ang insidenti sa Tunga Municipal Police Station kinsa nagpahigayon ug “hot pursuit operation” sa pakig-koordinasyon sa Carigara Municipal Police Station. Hinungdan nga naaresto ang suspek didto sa Carigara District Hospital.
Narekober sa iyang posisyon ang usa ka 9mm Jericho pistol. Nidangat ang taga Scene of the Crime Operative (SOCO) gikan sa RFU-8 aron pag-proceso sa crime scene kinsa naka rekober pa sila ug duha (2) ka fired cartridge cases sa caliber 9mm ammunition. Gi-kustodiya na sa Tunga MPS ang suspek nga matud pa usa ka hepe sa estasyon sa usa ka lungsod sa Bliran Province. “The PNP does not condone any wrongdoing, regardless of rank or position. The swift arrest of the suspect shows our firm commitment to uphold the rule of law and ensure that justice is served without fear or favor,” nagkanayon si PCOL Apas, ang Leyte Provincial Police Director. Ni Josie Serseña (EV Mail SEPTEMBER 22-28, 2025 issue)
