ISABEL, LEYTE – Arestado ang usa ka High Value Target (HVT) pinaagi sa joint buy-bust operation niadtong Hunyo 27, 2025 sa Brgy. Matlang, ning lungsod.
Ang suspek mao si aliyas “Gardo,” 48 anyos ug residenti gihapon sa nasangpit nga lugar kinsa gikategoriya nga No. 2 sa Regional Priority Target List (RPTL).
Nakompiska sa iyang posisyon ang upat (4) ka paketi sa gidudahang shabu, ingon man ang gimarkahan nga buy-bust money, ug uban pa. Ang operasyon maoy resulta sa hiniusang pwersa gikan sa Philippine Drug Enforcement Agency (PDEA) Regional Office 8, Station Drug Enforcement Team (SDET) sa Isabel Municipal Police Station, og PNP-Drug Enforcement Group (PDEG) Special Operations Unit 8 (SOU8)-Leyte Satellite Office.
Ang mga nakompiskang drugas gipa-ubos na sa forensic analysis didto sa PDEA-8 Laboratory sa Palo, Leyte. Samtang ang suspitsado tua na usab sa kustodiya sa PDEA-8 Detention Facility. Gikasohan siya batok sa paglapas sa Sections 5 ug 11, sa Article II sa Republic Act No. 9165 diin atubangon niya kini sa korte. (Ni Josie Serseña / EV Mail JUNE 30-JULY 6, 2025 issue)
