ORMOC CITY – Kapin kon kulang sa usa ka simana sa hospital ug na operahan ang 32 anyos nga police kinsa gitigbas sa 69 anyos nga lalaki, samtang napusilan naman sa police ang nang hasi nga hubog ug namatay.
Ang insidenti nahitabo sa Purok 6, Brgy. Juaton, Ormoc City pasado alas otso sa gabii niadtong Septiembre 26, 2025.
Mismong si Police Regional Director BGen. Jason L. Capoy ang personal nga nibisita ni Patrolman Jan Learre F. Adora niadtong Septiembre 28 samtang naadmit sa Ormoc Doctors Hospital. Gihatagan ug importansya sa PNP Regional Director ang dedikasyon niini pagpreserbar sa kalinaw sa komunidad, pinaagi sa paghatag og Medalya ng Sugatang Magiting, ingon man tabang financial.
Mahinumdoman nga girespondihan sa grupo ni Pat. Adora ang lugar gumikan sa nadawat nga taho sa Ormoc City Police Station 2 kabahin sa lalaki nga naka distorbo na sa mga kasilinganan. Pag-abot didto sa mga autoridad imbis mahupay ang hubog nga may dalang hait nga hinagiban, gitigbas hinuon niini ang police gamit ang 22 inches nga sundang ug naigo sa kamot ug nawong, sa may mata niini.
Sa unang higayon, natumba ang police ug usban pa unta pag-atake sa hubog, apan naka hulbot ang police sa iyang armas dayon pusil sa hubog ug naigo sa lawas. Pariho silang duha nga gidala sa tambalanan aron matambalan pero ang hubog gidiklarang dead on arrival. Ni Josie Serseña (EV Mail September 29-October 5, 2025 issue)
