ORMOC CITY – Nag-malamposon ang ika-44 nga Annual General Membership Assembly (AGMA) sa mga miembro tag konsumo sa Leyte Electric Cooperative V (LEYECO V), alang sa taga 3rd ug 4th District sa Lalawigan sa Leyte, diin ang katapusang hut-ong sa panagtigum didto gipahigayon sa Ormoc Superdome niadtong Hulyo 12, 2025.
Sumala pa sa Board President nga si Director Paulito A. Cotiangco (Ormoc North-District 1), karong tuiga gihimo kini nga “sequential,” ang una niadtong Hunyo 22 sa lungsod sa Villaba, Hunyo 28 sa Isabel, ug Hulyo 5 sa Leyte. Kay tuyo sa Kooperatiba nga maabot gyud ang kasayuran sa nanag-iya nga 160,000 member-consumers gikan sa 11 ka Municipalidad ug ang syudad sa Ormoc, “kon unsa na ang dagan sa Kooperatiba.”
Tumong usab sa asembliya nga ipasabot sa mga tag-iya nga miembro ang mga programa, proyekto ug kalamposan sa nilabay nga tuig, ingon man ang mga plano alang sa progreso pa sa 2025. Ang General Manager nga si Atty. Jannie Ann J. Dayandayan, CPA, nagkanayon nga puno man sa mga pag suway o “operational trials” ang 2024, pero ang katawhan maoy ilang kadasig sa pagserbisyo.
Gani “excited na sa journey” ang LEYECO V para sa 2025, aron mas matagamtaman pa sa mga liboan ka miembro ang “pag-alagad nga madasigon.” Kay alang sa pamunuan ug tigdumala sa LEYECO V dili lang basta kahayag sa koryenti ang masinati sa publiko pero labaw sa tanan ang paglambo sa kinabuhi. (Ni Josie Serseña / EV Mail JULY 14-20, 2025 issue)
