ORMOC CITY – Padayon ang pagpalapad sa imbistigasyon sa Ormoc City Police Station 2 (OCPS-2) kalabot sa giingon nga “kidnapping incident” o pagdagit sa usa ka babaying biktima nga nahitabo sa ilang hurisdiksyon; sanglit limitado pa ang ilang buhian nga impormasyon ning pag balita.
Pero gikompirma sa kapolisan sa maong estasyon nga nagpa-blotter na ang tagtungod, kalabot niini nga alegasyon.
Mahinumdoman nga nagpaabot sa kasayuran ug nangayog tabang ang kabanay sa biktima nga si Akini Arradaza pinaagi sa social media. Nag-kanayon pa nga gikuha sa wala pa mailhi ug mga armado ang biktima dayon gisakay sa itom nga Toyota Wigo nga may plakang 1799 sa buntag sa Hulyo 31, 2025 atubangan sa ilang tindahan sa highway sa Brgy. Valencia, Ormoc City.
Sumala pa sa kuha sa CCTV nga nipaingon sa direksyon pagawas ang gigamit nga sakyanan sa Valencia nga border. Nanawagan ug tabang ang pamilya sa biktima sanglit duna kini tolo (3) ka anak nga mga gagmay pa. Hangtod niadtong Dominggo sa buntag wala pa usab “update” ang kapolisan kon hain ang biktima, kinsay mga suspitsado ug ang motibo pagdagit kaniya. (Ni Josie Serseña / EV Mail JULY 28-AUGUST 3, 2025 issue)
