ISABEL, LEYTE – Usa sa gihatagan ug konsiderasyon karon sa bag-ong pamunuan sa Municipalidad sa Isabel ang paspas nga pagserbisyo gamit ang teknolohiya.
Kalabot niini nga mga implementasyon ang gihisgutan atul sa pagbisita nila ni Vice President Jahaziel Rodado ug Project Manager Director Jehiel Rodado sa Netgenix Inc. ug EveCS Digital Network Inc. aron makig miting ni Mayor Bennet Pongos niining simanaha. Nitambung usab ang Municipal Administrator nga si Atty. Renadeth Apple Cartagena.
Partikular nga agenda ang implementasyon sa digitalization ug Smart City initiatives sa lungsod sa Isabel. Base sa kasayuran pinaagi sa Facebook Page lakip sa proyekto ang pagdugang ug suporta sa “supply design para sa CCTV systems, internet-based warning systems, public address systems, ug Tele-Medicine services.”
Gidamhan nga sa nasangpit nga teknolohiya makapaayo kini sa ilang pagserbisyo sa katawhan. Ingon man usab matabangan niini ang poblacion hangtod na sa mga barangay. Nagkanayon pa kini nga, “Ang tinguha mao ang paghatag ug mas episyente nga serbisyo sa katawhan pinaagi sa modernong teknolohiya, nga maghatag ug kahayag ug seguridad sa katawhang Isabelanon.” (Ni Josie Serseña/ EV Mail JULY 28-AUGUST 3, 2025 issue)
