ALBUERA, LEYTE – May mga igo sa bala ang pick-up nga sakyanan ni Kapitan Enrico “Rico” Barcelona sa Brgy. Tinag-an, Albuera, Leyte human kini girakrakan dapit sa highway sakop sa Brgy. Tabgas sa maong lungsod mag-alas singko sa hapon, Agusto 2, 2025.
Ang 41 anyos nga biktima gidala dayon sa tambalanan sa Ormoc City human makaangkon ug pinosilan sa tuong bahin sa iyang likod (ubos sa abaga). Nasayran mismo sa kasaligan nga tinubdan nga luwas na ang kahimtang niini, naa na sa “stable condition,” matud pa sa source. Matud pa usab, samdan o nadaplisan sa olo ang 21 anyos nga driver sa Kapitan.
Samtang pagrespondi sa autoridad naabtan didto sa crime scene ang nagpasad nga bala sa tag-as nga kalibre sa armas. Naglunsad usab dayon ug “hot pursuit” ang kapolisan sa Albuera para madakpan ang mga suspek ug masayran ang motibo sa krimen. Nasayran nga kanhi na may mga hulga na sa iyang kinabuhi ang Kapitan.
Niadtong midterm election, nilansar pagka-Konsehal sa lungsod si Kap. “Rico” Barcelona ubos sa Albuera Development Team (ADT). Mahinumdoman usab nga didto sa iyang barangay nahitabo ang pagpusil atul sa pangampanya ni Albuera Mayor Rolan Espinosa. (Ni Josie Serseña / EV Mail JULY 28-AUGUST 3, 2025 issue)
