ALBUERA, LEYTE – Patay diha-diha dayon ang usa ka lalaki human giingon nga nagpusil sa iyang kaugalingon sulod sa balay ni Albuera Mayor Rolan Espinosa sa Sitio Tinago, Brgy. Binolho hapon niadtong Agusto 7, 2025.
Nasayran nga usa siya sa ilang mga empleyado. Sa report sa Albuera Municipal Police Station (MPS), ilang girespondihan ang tawag sa 911 mga alas onse pasado sa buntag (11:16 A.M.) kabahin sa alegasyon sa “illegal discharge of a firearm.” Pag-abot sa autoridad sa lugar gisugat silag mga tawo nga nagkanayon nga ang “firearm had been discharged within the residential compound.”
Sa inisyal nga imbistigasyon naila ang suspek nga si alyas “Atoy,” kinsa armado ug .45 caliber pistol, nga matud pa nagpabuto sulod sa compound. Pagka human ang maong lalaki kalit nisulod sa main building ug nidiritso pagsaka sa second floor ug nisulod sa usa sa mga kwarto ug gitrangkahan niya kini.
Una, mismo si Mayor Espinosa ang nakig negosasyon sa suspek kinsa kadugayan nag-request ug presensya sa media. Mga alas 2:30 sa hapon, niabot ang media gikan sa Ormoc, dayon gikahinabi ang lalaki sulod sa 30 minutos, apan samtang sila nag-estorya kalit nakabati silag “single gunshot” gikan sa kwarto.
Dali nga nirespondi ang mga autoridad agi sa gibuak nila nga bintana sa CR ug nagpalopad sa drone camera aron masuta ang sitwasyon sa sulod. Nakita sa drone video si alyas “Atoy” nga naghigda sa katre nga nagkadugo ug wala nay kinabuhi.
Nakig coordinate dayon ang kapolisan sa Crime Field Unit (CFU) sa Ormoc aron e-proceso ang crime scene. Nakaangkon ug pinosilan sa ulo ang lalaki. Padayon ang imbistigasyon sa kapolisan kabahin sa insidenti. (Ni Josie Serseña/ EV Mail AUGUST 4-10, 2025 issue)
